නිතිය හා සාමය රජයන ජන සමාජයක නිදහස උපරිමයෙන් භුක්ති විඳීමේ අයිතිය සිවිල් වැසියන් සතුව පවතින බැව් නීතිය හා සාමය සහ දක්ෂිණ සංවර්ධන අමාත්‍ය ගරු සාගල රත්නායක මහතා 69 වන නිදහස් දිනය වෙනුවෙන් සුභ පැතුම් පණිවුඩයක් නිකුත් කරමින් පවසා සිටී.

යටත්විජිත මානසිකත්වයෙන් මිදී ශ්‍රී ලංකාව ස්වාධින ජාතියක් වශයෙන් නැගී සිටීමේ ඵෛතිහාසික සංසිද්ධිය අනුස්මරණය කරමින් සියළු ලාංකිකයන්ගේ 69 වන ජාතික නිදහස අද අභිමානයෙන් යුතුව සමරති.

පසුගිය කාලය පුරාම නීතිය හා සාමයට සිදුවූ බරපතල ව්‍යවසනයෙන් මිදී, මතින් තොර, දූෂණයෙන් නාස්තියෙන් විනිර්මුක්ත සමෘධිමත් නිවහල් දේශයක් කරා පියනැගීමට අවශ්‍ය මානව නිදහස දැන් උදාවී තිබේ.

නිදහසෙන් පසුව ගෙවී ගිය 69 වන වසර තුල රටවැසියා සාමකාමී සහජීවනයෙන් යුතුව, නීතියේ ස්වාධිපත්‍ය රාමුවෙන් පරිබාහිරව සාමකාමී අර්ථපූර්ණ නිදහසක් භුක්ති වින්දේද යන සංශය අනාගත පරපුරට අද ඉතිරි නොකොට, ජනතාව අපේක්ෂිත සැබෑ නිදහස ස්ථාවර කිරීම් වෙනුවෙන් යහපාලන රජය අවශ්‍ය ව්‍යවස්ථාමය සංශෝධන හා ප්‍රතිසංස්කරණ සිදුකරමින් පවතී.

ජනතාවට නිදහසේ සිටීමට, නිදහසේ ක්‍රියා කිරීමට අවශ්‍ය නීතිය හා සාධාරණීත්වය රජයන දැහැමි සමාජයක් දැන් උදාවී ඇත. එහෙයින් සමෘධිමත් දේශයක සංවර්ධන ක්‍රමෝපායන් ඉහල නැංවීමේලා “මානව නිදහස” සමාජයට සිදුකරන උත්තේජනය අති මහත්ය. මුළු ලෝකයකට හඬගා කියන ලොව අන්කිසිදු ජාතියකට නොදෙවෙනි අපගේ අතිත ශ්‍රී විභූතිය, 69 වසරක් පුරා ගොඩනැගී ඇත්තේ එදා ලක්වැසියා නිදහස හා නිවහල් නීතිය හා සාමයෙන් පිරුණු යුග වල පමණක් බව ඉතිහාසය සාක්ෂි දරයි.

දිනූ දේශයේ ආරක්ෂා කිරීමේ වගකීම පැවරී ඇත්තේ ශ්‍රී ලාංකික පුරවැසියන්ටය. එහෙයින් මේ දේශයේ අවශ්‍යතාවය නිදහස තුලින් ස්වයංපෝෂිත දේශයක් ගොඩනගන්නට අපකැපවී ක්‍රියාකිරීමය.

සංවර්ධනය තුලින් සමෘධිමත් දේශයක් ගොඩනැගීමට එක්සත්ව කටයුතු කරන්නට මේ 69 වන නිදහස් සැමරුමේදී පතිඥා දෙමු. මව්බිමේ නිදහස, මෙන්ම නීතිය හා සාමය රැක ගැනීම උදෙසා දිවිපිදූ සියළු රණවිරුවනට ජාතියේ උත්තමාචාරය පුදකරමු.

69 වන ජාතික නිදහස් දින සැමරුමට සුභාශිංසන පණිවිඩයක් නිකුත් කරන්නට ලැබීම මහත් භාග්‍යයකි. අප ප්‍රෞඩ ඉතිහාසයක සාඩම්බර හිමිකරුවන් ය. වැවත්, දාගැබත්, ගමත්, පන්සලත් යා කළ හැකි ඉපැරණි සංස්කෘතියක පෙරගමන්කරුවන්ය. නිදහසේ අරුනැල්ලෙන් පිබිදී, යහපාලන යථාර්තයේ හිරු කිරණින් ලක්වාසි සැමට නීතිය හා සාමය සුරැකෙන සුපිළිපන් සමාජයක දොරගුළු විවර විය.

සාමකාමී නිවසක සාමාජිකයින් සාධාරණ දැහැමි සමාජයක කොටස් කරුවන්ය. ඔවුන් ස්වාධීන ජාතියක නිදහස සුවසේ භුක්ති විඳින, සංවර්ධන ඉලක්ක කරා සිය මසැස මෙහෙයවන සමාජ පෙරටුගාමීන්ය. ඔවුන් සමාජ දාමයක පුරුක් එකිනෙක යා කරන සිවිල් සාමාජිකයින්ය.

සිවිල් සමාජ පුරවැසියන් සිය සමාජානුයෝජන ක්‍රියාවලිය හුවමාරු කරගත යුත්තේ නීතිය හා සාමය වඩාත් කුළුගැන්වෙන ආකාරයටය. යුක්තිය රජයන සාධාරණ සමාජයකට නීතියේ ස්වාධිපත්‍යය වඩාත් අර්ථවත් කිරීමෙහි පොලිස් සේවාවේ ගුණාත්මක වර්ධනය හේතු වන්නේ එවන් වටපිටාවක් තුළය.

එකම ධජයක් තුළ එක හෙවනකදී ජාති, ආගම්, කුල භේද නොසලකා ජාතියක් වශයෙන් එකමුතුව සමරන මෙම නිදහස සුවිශේෂී වන්නේ අතිගරු ජනාධිපතිතුමන්, අගමැතිතුමන් ප්‍රමුඛ මහජන නියෝජතයින්ගේ ඉදිරි සංවර්ධන ඉලක්කයන්ගේ සාර්වත්‍රිකබාවය මතය.

රටක සංවර්ධනයට හේතු වන පුද්ගල සංවර්ධනයේ මූලික අඩිතාලම ගොඩනැගෙන නිදහස් නිවහල් සාමකාමී පරිසරය, සමතුලිතව පවත්වා ගැනීමට රාජ්‍ය නිලධාරීන් වශයෙන් අප නිරතුරුව ඇප කැප වී සිටින්නෙමු.

දිනූ දේශයේ ලැබූ නිදහස ආරක්ෂා කරමින් සංවර්ධන ඉලක්කයන් ජය ගැනීමට රජයටත්, නිදහස වඩා අර්ථවත්ව, සාමකාමී සහජීවනයට ඇවැසි කායික, මානසික, සන්තුෂ්ටිය පෙරදැරිව මතින් තොර, දූෂණයෙන්, නාස්තියෙන් තොරව නිදහස් ජන සමාජයක ජීවත් වීමට ලක්වැසි සියළු දෙනාටත්, 69 වන ජාතික නිදහස් දිනය වෙනුවෙන් මාගේ සුභාශිංසන පිරිනමමි.